HASRAT MOHANI
1875 – 1951|DelhiIndia
nahīñ aatī to yaad un kī mahīnoñ tak nahīñ aatī
magar jab yaad aate haiñ to aksar yaad aate haiñ
terī mahfil se uThātā ġhair mujh ko kyā majāl
dekhtā thā maiñ ki tū ne bhī ishāra kar diyā
aise bigḌe ki phir jafā bhī na kī
dushmanī kā bhī haq adā na huā
kahne ko to maiñ bhuul gayā huuñ magar ai yaar
hai ḳhāna-e-dil meñ tirī tasvīr abhī tak
ġham-e-ārzū kā ‘hasrat’ sabab aur kyā batā.ūñ
mirī himmatoñ kī pastī mire shauq kī bulandī
allāh-rī jism-e-yār kī ḳhūbī ki ḳhud-ba-ḳhud
rañgīniyoñ meñ Duub gayā pairahan tamām
aur to paas mire hijr meñ kyā rakkhā hai
ik tire dard ko pahlū meñ chhupā rakkhā hai
mujh ko dekho mire marne kī tamannā dekho
phir bhī hai tum ko masīhā.ī kā da.avā dekho
hai mashq-e-suḳhan jaarī chakkī kī mashaqqat bhī
ik turfa tamāshā hai ‘hasrat’ kī tabī.at bhī
hai intihā-e-yās bhī ik ibtidā-e-shauq
phir aa ga.e vahīñ pe chale the jahāñ se ham
mānūs ho chalā thā tasallī se hāl-e-dil
phir tū ne yaad aa ke ba-dastūr kar diyā
mirā ishq bhī ḳhud-ġharaz ho chalā hai
tire husn ko bevafā kahte kahte
ḳhūb-rūyoñ se yāriyāñ na ga.iiñ
dil kī be-iḳhtiyāriyāñ na ga.iiñ
un ko yaañ vaade pe aa lene de ai abr-e-bahār
jis qadar chāhnā phir baad meñ barsā karnā